Fotoutstilling og orgelkonsert i Stedje kyrkje

Denne kvelden vert deler av utstillinga «All that was left was a yellow duck» stilt ut i Stedje kyrkje. Dette er ein fotoserie som hyllar den nasjonalromantiske kunstnaren Hans Gude (1825 – 1903), saman med bruk av humoristiske element. Mellom anna er ein gul badeand element i fleire av bileta. Bileta er i hovudsak tekne i Luster og Jotunheimen. Denne kvelden vert det og premiere på eit heilt nytt bilete, også dette teken i Luster.

Etter ei stund glir utstillinga over i orgelkonsert med Kåre Nordstoga, der han spelar Edvard Grieg sine Holberg variasjonar, og «Seks improvisasjoner over norske folketoner» av Arild Sandvold.

Foto: Ole Marius Jørgensen

Ole Marius Jørgensen (f. 1976) er ein fotokunstnar basert i Asker. Han er mest kjend for sine iscenesatte fotografi, og han nyttar ofte teatralsk lys og levande fargekombinasjonar i sitt arbeid.

Han vaks opp på 80-tallet, og blei fascinert av den amerikanske popkulturen, gjennom filmar og bøker. Hollywood sine polerte glansbilete satte djupe visuelle spor, noko som førde til filmstudier i både Noreg og England før han enda opp som fotograf. Alle hans seriar har eit sterkt filmatisk uttryk over seg.

Jørgensen har stilt ut i inn og utland sidan 2009, og hans bilete kan du finne i mellom anna Hong Kong, New York, Los Angeles, Madrid og Berlin.

Foto: Ole Marius Jørgensen

Kåre Nordstoga (f. 1954) er domorganist i Oslo, der han har vore sidan 1984. Han er utdanna ved Norges Musikkhøgskole, der han hadde Kaare Ørnung som lærar i klaver, og Søren Gangfløt, Magne Elvestrand og Bjørn F. Boysen som lærarar i orgelspel. I 1982 fekk han stipendium frå Léonie Sonnings Musikkfond, noko som gav han mulighet til å studere hjå David Sanger i London.

Kåre har spelt inn ei rekke plater, med orgelmusikk av Cesar Franck, Charles-Marie Widor, Johann Sebastian Bach og Franz Liszt.

Han vann Lindemanprisen i 2006, og vart nominert til Spellemannsprisen i 2000 og i 2012. Han er rekna for å vere ei av dei fremste konsertorganistar i Europa, og vart i 2016 utnemnd til Ridder av 1. klasse av St. Olavsorden for sin innsats for norsk kyrkjemusikk.